عورت کوئی بھی ہو اسکی ساری زندگی خود کو منوانے میں گزر جاتی ہے۔ کہیں وہ خود پہ لگےتہمتوں کےان داغوں کو دھو رہی ہوتی ہے جو کہ اس کا گناہ ہی نہیں۔ کہیں نام نہاد معاشرے کے نام نہاد رسموں کی بھینٹ چڑھتی ہے۔ ”مکمل کچھ نہیں ہوتا“ بیشمار تلخ حقیقتوں کا ایسا مجموعہ ہے جو حادثاتی طور پر وقوعہ پزیر ہوا۔اس میں شامل ہونے والے افسانے ایک خاص خیال و عنوان کے تحت لکھے گئے ۔

کچھ معاشرے کی کڑوی سچائیاں ہیں تو کچھ انسانوں کے تلخ و بےدرد رویے جنہوں نے اس سوچ کو جنم دیا۔ کہانی کسی کی بھی ہو چنی، منتظر، شہ پارہ، آپ یا میں عورت اسی رنگ ڈھنگ میں جیتی ہے ۔سکرین پر سے چہرے بدلتے ہیں مگر کردار وہی رہتا ہے۔ عزتیں سرِ بازار بھی پامال ہوتی ہیں اور داغ سات پردوں میں بھی لگ جاتا ہے۔

”تخیل“، ”مرادکی بیوی“، ” کالی اینٹیں“ یا ”بابا زلیخہ“ کی کہانی ہو معاشرتی قدریں بھی تباہ ہوتی ہیں اور رشتے بھی چاہے وہ خون کے ہوں یا دل کے۔ حقیقت کوئی بھی، لکھنے والے لکھ لیتے ہیں اور پڑھنے والے بھی نظر ڈال لیتے ہیں، مشکل ہے تو حقیقت کو تسلیم کرنا۔۔